متابعة / نوال جويد  / البصرة

هو قضاء يقع في محافظة ذي قار الناصرية يضم بداخله العديد من العشائر الجنوبية الأصيلة لكن قلب المرتكز في هذا القضاء هي عشيرة الـ إبراهيم اولاد ابراهيم ابن مالك الاشتر ،،

 سيد دخيل سيد يرجع نسبهُ الى الإمام موسى الكاظم- ع - كان يعيش في قرية ريفية بسيطة يمتلك بنت واحد اسمها ( حلوه) لذالك يكنى بأبي حلوه  وولد اسمه فرج .. وايضاً من القابه..  سبع ازبيد و حراگ الظهر..  قبره الحقيقي في نفس المكان في المنطقة ..حسب ماسمعت من اهلي  چانت هذه المنطقة كلها اهوار يگولون السيد من مات خذوه  على سفينة رادو  ياخذونة ايدفنونه بالنجف فمن مشو بالسفينة طلعت امه تبچي وتصيح..

_  يمه ادخيل يمه ..

 يگولون السفينة بعد ماصاحت ام سيد دخيل رجعت من مكانها لهذا المكان اللي صاحت بيه امه وكل ماحاولو يدفعون السفينة ماتندفع فقررو يدفنونة بنفس المكان الوگفت بيه  السفينة وفعلاً دفنوه بنفس المكان .. سيد دخيل اشتهر ب شارته وبطلب المراد للي يعتني بنية صافية،، مرة من المرات اهلنه يسولفون يگولون اجو زوار من العشاير من قبيلة  زبيد  وحدة من الزايرات راحت تغسل بالشط القريب ع سيد دخيل بعدة مترات فمن غسلت طاح العران مالتها العران هو حلية من الذهب يستخدمنها النساء توضع ع الخشم للجمالية .. فمن طاح العران بقت تبچي اشلون ارجع لهلي وعراني مو وياي بس ارجع يگولون عاشجة ونطت العران العشيجها !

التفتت لقبر السيد وگالتله شتگول يبو حلوة ترضاها هيج ايصير بية وانا جايتك متعنية ؟اثناء  ماحجت طلع العران علئ ظهر سلحفاة احنه انسميها (الرگة) فأخذت العران وراحت لهلها وهاي القصة مشهوره ومعروفة لذالك تسمئ بسبع زبيد

 .. اما ليش سموه حراگ الظهر لأن شارته ماتبطي واضحة ابعين النهار ..وهواي اله قصص وشارات هذا بالنسبة لنبذة مختصرة عن السيد… 

 سيد دخيل يتصورونه البعض قرية بسيطة .لا سيد دخيل ولاية چبيرة لكن العشاير تحيط به من كل جانب وصوب لأن مرقد السيد صاير وسط هذه العشائر..

يمتلك قضاء سيد دخيل  على  العديد من المبدعين فمن الخطباء امثال الشيخ جعفر الابراهيمي والشيخ مله عزيز المعروف بأبو عدنان الناصري وايضاً تمتلك شعراء مبدعين ونحاتين رائعين ولاننسى رسامين مذهلين للغاية امثال حفيد  سيد دخيل  الرسام السيد عادل الموسوي ..قد يكون هذا القضاء فريد من نوعه بين خليط المجمتع الاخر فمثلاً اذا صارت فاتحة اتشوف كل المنطقة تحضر حتى لوكانو مايعرفون الميت منو..  فزعتهم وحدة وگعدتهم وحدة وعرسهم واحد وفاتحهم وحدة معروفين بالكرم والشجاعة ولاسيما انطو شهداء  بزمن النظام البائد و ينزف هذا القضاء بالشهداء بالحرب ضد داعش تقريباً وصل عدد شهدائهم اكثر من مية شهيد بين مقتول وفقيد ..

يگولون جانت وحدة اتحب واحد من سيد دخيل وبعدين عافها فكتبت اله رسالة اتگول بيها…

يحبة حلوة ياخراصة الهيل

يالطولك غصن نبگة…

عشگتك والعشج موعيب عشج الشيب بي حرگة

امشي اعليك سيد دخيل ومراده وبخت علگة…

يعثرك كون اذا جافيت عني ورايد الفرگة… ..

الطلع بالنخاوي اعران من شطه ابخشم رگة...

اريده ايطلع  الوزاك  عني  ابشارته ايطگه...

ونذر حنه لجيب وياي ودهن گبته الزرگة